Helstu upplýsingar

• Endurgreiðsla iðgjalda til erlendra ríkisborgara

  Gildi-lífeyrissjóður endurgreiðir ekki iðgjöld til erlendra ríkisborgara.

  Í samþykktum Gildis er að finna heimild til endurgreiðslu sjóðfélaga utan EES (grein 16.1) en samkvæmt ákvörðun stjórnar Gildis frá árinu 2013 er hún ekki nýtt. Með því er tryggt að allir sjóðfélagar sitja við sama borð. Allir sjóðfélagar geta hafið töku ellilífeyris við 60 ára aldur eða fengið greiddan örorkulífeyri ef slys eða veikindi skerða starfsgetu. Makar og börn eiga ennfremur rétt á maka- eða barnalífeyri við fráfall sjóðfélaga.

• Aukið mótframlag vinnuveitanda

  Samkvæmt kjarasamningi Alþýðusambands Íslands og fleiri við Samtök atvinnulífsins, frá 21. janúar 2016, hækkaði mótframlag launagreiðanda í 11,5% í þremur skrefum.

  	1. júlí 2016	1. júlí 2017	1. júlí 2018
  Launþegi greiðir	4,0%	4,0%	4,0%
  Mótframlag	8,5%	10,0%	11,5%
  Samtals iðgjöld	12,5%	14,0%	15,5%

• Stéttarfélagsgjöld

  Samhliða innheimtu lífeyrisiðgjalda sér Gildi um að innheimta stéttarfélagsgjöld fyrir þrjú félög.

  Atvinnurekendum sem tengjast kjarasamningum neðangreindra félaga á almenna vinnumarkaðnum ber að greiða félagsgjöld af launum starfsmanna sinna og iðgjöld til sjúkra-, orlofs- og fræðslusjóða viðkomandi stéttarfélags, samhliða greiðslu í lífeyrissjóð.

  Félag	Númer félags	Félagsgj.	Sjúkrasj.	Orlofssj.	Fræðslusj.
  Efling – stéttarfélag	112	0,7%	1%	0,25%	0,30%
  Verkalýðsfélagið Hlíf	115	1,0%	1%	0,25%	0,30%
  Félag hársnyrtisveina	467	0,9%	1%	0,25%	0,50%

  Nánari upplýsingar um mótframlag atvinnurekenda vegna kjarasamninga sem Efling á aðild að getur að líta á vef stéttarfélagsins.

• Endurhæfingarsjóður

  Öllum launagreiðendum, þar með taldir sjálfstæðir atvinnurekendur og þeir sem standa utan stéttarfélaga, ber lögum samkvæmt að greiða 0,10% af heildarlaunum starfsmanna í VIRK starfsendurhæfingarsjóð. Standa ber skil á iðgjaldinu til þess lífeyrissjóðs sem lífeyrissjóðsiðgjaldið er greitt til.

  Sjóður	Númer sjóðs	Gjald
  VIRK starfsendurhæfingarsjóður	R200	0,10%

• Séreign

  Launþegar sem ganga frá samningi um séreignarsparnað og láta draga af launum sínum 2-4% eiga rétt á 2% mótframlagi frá launagreiðanda samkvæmt flestum kjarasamningum.

• Bankakröfur

  Þegar skilagrein er send inn á rafrænan hátt er hægt að láta kröfu myndast í banka um leið og skilagreinin er send til sjóðsins.

  Bankakröfurnar myndast eingöngu samkvæmt innsendum skilagreinum. Þegar skilagreinin hefur verið yfirfarin af sjóðnum getur komið í ljós misræmi á milli innsendrar skilagreinar og yfirfarinnar skilagreinar. Ekki myndast ný krafa í netbanka vegna þess.

  Ef iðgjöldin eru greidd eftir eindaga reiknast dráttarvextir en ekki myndast krafa vegna þeirra í netbanka.

  Kröfur eru í netbanka þar til daginn eftir eindaga en þó aldrei skemur en 10 daga eftir stofnun.

  Launagreiðandi ber ábyrgð á greiðslu iðgjalda til sjóðsins, einnig þó að krafa myndist ekki í netbanka eða falli þar niður.

  Ef eldri iðgjöld eru í vanskilum þá gildir eftirfarandi:

  1. Séu vanskil á eldri iðgjöldum, sem ekki hafa verið send til löginnheimtu, er greiðslu á bankakröfu ráðstafað inn á eldri iðgjöld. Fyrst til greiðslu áfallins kostnaðar og dráttarvaxta og síðan inn á höfuðstól eins og til fellur.
  2. Séu vanskil á eldri iðgjöldum sem send hafa verið til löginnheimtu þegar bankakrafa er greidd, er greiðslu ráðstafað inn á eldri vanskil svo sem greinir í 1. tölulið séu slík vanskil til staðar, en annars inn á iðgjöld samkvæmt viðkomandi bankakröfu/skilagrein. Gildi-lífeyrissjóði er þó ávallt heimilt að ráðstafa greiðslunni til lækkunar á kröfu sem sætir löginnheimtu, sbr. nánar gr. 9.10. í samþykktum Gildis-lífeyrissjóðs.